بطلتي توحشيني

في الليل والناس نيام والكل في حاله سارح
مر عليّ الكلام مسنون وحزين وجارح
الست ساعتها غنت في الراديو لسه فاكر
والنحلة النايمة طنت لما صحيوا العساكر
وعساكري ليل دماغي في خناق هيجيبوا داغي
والشوق عمال يلاغي والقلب ضعيف ولكن

في الليل والناس نيام والكل في حاله سارح
عد عليّ الكلام مسنون وحزين وجارح
الست ساعتها غنت في الراديو لسه فاكر
والنحلة النايمة طنت لما صحيوا العساكر
وعساكري ليل دماغي في خناق هيجيبوا داغي
والليل عمال يلاغي والقلب ضعيف ولكن

أكتب عن وصف ألمي ولا عن بعد ناسي
ولا عن حب خذني وشغلني وهو ناسي
الصبح منامه فارقه خلاه هجر السراير
والقلب هيامه سارقه والعقل نشيط وفايق
أنا لما كتبت شعري و وصفت الوحشه ليكي
رخصت بنفسي سعري أملأ شعري يراضيكي
ولقيت ولا شعري نافع ولا قلبي البيت أويكي
عمال ادفع وادافع عن حقي الشخصي فيكي
مش عارف اقول كرهتك مش عارف اقول ناسيكي

كملتك الف مرة ما نقصتش إلا بيكي
النور شقشق ولالا والحالة تجر حالة
والهم اللي في فؤادي واصل لله تعالى
هو العالم بأمري وبفعلي طول سنيني
هو العارف بقلبي كاتم في الليل أنيني
كان نفسي تحسي بيّ كان غرضي تفهميني
تمحي الحزن اللي فيّ تتراضي وتراضيني
وادي الحزن اللي أخذته والجرح اللي اعتمدته
بيقول قلبي بإرادته بطلتي توحشيني

أنا، أنا ياما سعيت في حبك
أنا ياما سعيت في حبك وعملت لبكرة شادر
وإنت مع كل مرة تيجي زي اللوادر
بتهدي عليّ أملي وتحلي بشكل عملي
كنت بتجيبي أجلي وأنا كنت تمام وحاضر
خبطتي فتحت بابي عمري ما قفلته مرة
جرحك فوق استيعابي والموجة تملي حارة
العمر في وهمه عدّى والعدة تجر عدة
ألة جاهزة ومعدة علشان تقتل عتابي
أنا جاي من الشعب عادي وإنت بنت الأكابر
ساكنة قرب المعادي ساكن قرب المقابر
حولت الغلطة فيكي وعملتي عليّ حاكم
وبقيت عايش، بقيت عايش

حولت الغلطة فيكي وعملتي عليّ حاكم
وبقيت عايش لوحدي مترمي في المحاكم
الغلطة تملي عندي الجرح تملي ليّ
عايش في الشوق بلاكم بضرب وبتيجي فيّ
العمر بيجري قطره والشطر يجر شطره
وشتايه في عيني مطروا ولا واحد حس بيّ
أنا من ساعة ميلادي وأنا بحكي القصة ديّ
هو كان حب هي مابقاش حابب وديني

بطلتي توحشيني
من أول حد قال لي إني موهوم وغافل
من أول حد قال لي إني موهوم وغافل
ولآخر شخص مالي ولقاني عنيد وقافل
وأنا ماسك طوب رجايا وبدور طحن في رحايا
واتاري الشوق عصايا والضرب شديد وحافل
كان عقلي يقول غثوني والقلب يقول تمهل
الدمع يصيد عيوني والخد يقول مؤهل
كنت ارفع صبري فيكي وامسح بالحب تحته
قلبك عور براحته قلبك خبط براحته
وانا كنت وحيد وحاير بين قطم الشئ ونحته
الزرع ده آه فلاحته والباب ده أنا آه فتحته
مش بس قبلت قلبك وكمان برأت ساحته
أنا في العالم بحاله ما في واحد حب قدي
عشمان في سلام مؤجل عشمان في حديد مصدي
الكلمه سخيفه عدي المركب شاردة هدي
الدنيا ضبابي لندن وشايفها سويسرا وردي
ملكتك نص أرضي جرفت سنين في طيني

بطلتي توحشيني
الحب يعز صاحبه الحب يزيد مقامه
ويبان في عينه وصمته وشكله ونوع سلامه
ويبان على كل حركة ويكون فعله وكلامه
وإنت لو جاي منك كان بان في سنين ما بينا
الزين ينهض ويمشي والشين يعرف مقامه
أنا نادر باقي عمري للي هتصوني بعدك
عمرك ما وفيتي عمري ما خلفت وعدي
عمرك ما وفيتي وعدك
بكرة يقابلني خلي وإنت هتموتي وحدك
وأنا ببدا صفحة بيضا صفحة واسعة وعريضة
مشتاق لحياة جديدة ولبنت تصون هوايا
كان لازم أعيش عذابك علشان أعمل بداية

وادي ختام الحكاية مريت مريتي مرو
سنوات عمري اللي كرو
عمر الأشوق ما سرو فاروا الأوجاع وفروا
وضاروا الأحباب وضرو وباروا ساعة ما برو
وعيروا بهموم وعرو وغاروا ساعة ما غروا
وأحلى الإحساس أمره وأوفى الإحساس أشره
وأبرد إحساس أحره جارو وببطئ جرو
ونزفوا الدمعات وخروا واليوم صحيوا واستقرو
فخلعتك من روتيني بطلتي توحشيني