U Cervu Corsu

Sogu u cervu, u cervu corsu
L' animaleddu sbanditu

U culombu, la me morti
Laca u corvu ammutulitu

Mai più u mi visticarè, o crudeli cacciadori
Da Capicorsu à Pumonti, maladettu vincitori
Sogu u cervu, u cervu corsu chi si n' inveni di l' aresta
Di la friscura, lu boscu quandi Austu faci festa
Indi sè, la me faieta, sbucciata à middi maglioli
U me verdu puntiddonu, colmu à paci muntagnola
L' altora si hà spizzicatu, i me carri varmicosi
Ma ribomba la me chjama in li lamenti vintosi

A surgenti sarà sicca è l'acquaccia tricaticcia
Turrarà lu biitoghju in una nera fanganicia
O Corsu, fiddolu d' ochji, lu me sirvonu sfidatu
Arrimitu da lu soldu, di la mufra chì n' ai fattu
Eiu ùn temu ghjacariccia, nè piumbu nè caccia mossa
Ti facciu per sempiternu a lascita' lli me ossa
Tù chì và l' anima incheta, eiu sogu un agrunditoghju
S' è tù ci scontri l' arieta, ti purtarà lu me moghju

Lu me schiletru bianchicciu chì si dissicca in la machjetta
Finch' un falcu ghjunghjiticiu ni sumenghji la pruneta
Voddu cù l' antichi Corsi, movamini in Paradisu
A bramà per tempu eternu... Signureddu à lu to visu
Quandi l' ultima fuchera s' avarà tusu li monti
Quandi u primu sullionu s' avarà spintu li fonti

Quandi l' ultima fuchera s' avarà tusu li monti

Quandi u primu sullionu s' avarà spintu li fonti