Soi

Soi la nieve nel Aramo,
una braña nel Urriellu,
un regueru qu'alimenta
en Tarna a la Nalona.

Soi la veta de carbón
que camudó los valles,
qu'esnudó los montes,
qu'aferruñó l'aráu.

Cómprame una cabeza nueva!
Que nun soi quién a vivir d'otra manera.

Soi'l barcu qu'espera
nel puertu a la marea,
la murnia del que marcha
d'El Musel a Buenos Aires.

Soi antorcha nuna fuelga,
qu'alluma l'alborada,
que priende la mecha,
qu'abre la esperanza.

Cómprame una cabeza nueva!
Que nun soi quién a vivir d'otra manera.

El pañuelu del fugáu
nos puertos de Güeria,
la maleta'l desterráu,
el sangre que sema.

Soi tolo que soi
porque respiro y piso tierra,
y nun soi quién a vivir
d'otra manera.

Cómprame una cabeza nueva!
Que nun soi quién a vivir d'otra manera.