Diciossetti

U celu rossu à marina
Luci tali un focu ardenti
Schiarisci quista cunfina
Di culori rutilenti
Li pari chì s'hè finita
Cù issa ghjurnata ogni vita

Vecu li me amicacci
Addurminati in sti prati
Eu ùn possu dorma in paci
Pensu à li ghjorni passati
Po ancu li ghjorni à vena
Ci ferma trè mesi à tena

O la me cara francesca
S'è tù vidissi a purezza
Di u rossu in l'aria fresca
Cù issu verdi chì biddeza
Pari una vechja pittura
Di a più bedda fattura

Ma ùn si movi la ghjenti
Nimu mi voli risponda
Si so pisati li venti
Faci una bedda stonda
Ma di l'amichi ùn si senti
Terza, bassu è siconda

O diù parini foli
Li me ghjambi so spariti
In stu locu semi soli
È ùn stemi manc'arritti
Forsi voi... seti morti??
Dui ghjorni chì steti zitti

Pigliu u stilettu di manu
Da caccià mi sta vitaccia
Ùn cregu più in l'umani
Anc'a me fedi si straccia
Com'è una vechja bibbia
Fatta cù a cartulaccia

Ùn sentu più ogni bomba
Lu me ciarbeddu chjarisci
Posu annant'à la me tomba
È la me corpu ferma solu
L'anima piglia u so volu