Cantede S’Amore

Che una rundine lizera
Cheria in altu olare
E che sirena cantare
In custa notte a s'aera

Nd'apo su coro pienu
De dulche e bell'armonia
E dae sa oghe mia
Nd'essit su cantu serenu

Notte giara e luminosa
Lughen istellas e luna
E paret chi sa fortuna
Beneigad' ogni cosa

Ogni campagna in fiore
Ogni carrela è mudada
E deo vivo incantada
Sa dulzuras de s'amore

Non chelzo oe pensamentos
Ne piantos ne dolore
Chelzo cantare s'amore
Senza penas e turmentos

Canto serena e festosa
Canto boghes de allegria
Tottu incantu e poesia
Es custa notte diciosa

È s'amore chi apo in coro
Che fiorida primavera
Es custa sa gioia vera
Es custu veru tesoru

Non bi tenzo bramosia
Pro sa' ricchesas, peruna!
Apo in coro ogni fortuna
Cun s'amore è gioia mia

E che rundine lizera
Cheria in altu olare
E che sirena cantare
In custa notte a s'aera