Waltzing Mathilda (And The Band Played Waltzing Mathilda) (Live)

THE BAND PLAYED WALTZING MATILDA

1. Als gunger Kerl bi’ ich fort von drham
Ho gelebt wie mr’s grade ’nein Sinn kam
Drobn von’ Bergn bis zun Meer no mit de Madle getanzt
Außer Waltzing Matilda hat’s nischt gabn
Bis in neinznhunnertfuffzn dr Vater Staat maant
Mir habn e Arbeit fr diech, hast lang genug rumgetrant
Un ’en Blechtopp nauf’n Nüschel un e’ Knarr nei de Hand
Un in’ Kriech neigeschickt des war aans

Refr: Un de Band spielt Waltzing Matilda
Als mr nunner zen Hafen sei hie
Mit Hurra und mit Fahn’ und mit Wasser in’ Aagn
Sei mr los nach Gallipoli

2. Ich entsinn mich noch, wie in den schrecklichn Tagn
Mr förmlich im Blut sei geschwomme
Wie es liebe Vieh sei mr oogeschlacht’ wordn
Mit dr Höll hat sichs net viel genomme
Drübn stand dr Türk und war gut ei’geschossn
’s hat Kugln geregn’t un Granatn gegossn
Un in knapp fünf Minuten zur Höll neigeblosn
Un ham nach Australien war aans

Refr: Un de Band spielt Waltzing Matilda
Als de Lei’ng war alle begrabn
Jeder hat mit Habacht schnell de Opfer beklagt
Und scha’ gings uns wieder ans Laabn

3. Und die, die noch gelebt habn, habn krampfhaft gesaah
Ne Tod un ne Feier ze trotzn
Zaah Wochn, die so trostlos, so jämmerlich warn
Wie dr Leinggestank ringsum zum Kotzn
Dann hat mr e’ Granat’ ne Arsch aufgerissn
Binn Erwachn war ich scho’ ins Spital ei’gewiesn
Und gesaah, was passiert war und losgreine müssn
Und tot ze sei wolln, des war aans


Refr: Oh nie wieder Waltzing Mathilda
Von weegn den verdammtn Scheißkrieg
Zum Tanz braucht e’ Ma’ wie zum Bumsn zwaa Baa
Nie mehr Waltzing Matilda fr miech

4. Se habn de Lädiertn und de Krüppel gesackt
Und aufs Schiff nooch Australien verlad’n
Die de Arm und de Baa und ne Verstand verlorn hattn
Bei ihr’n ach so glorreichen Tat’n
Und als das Schiff in den Hafen nei kam
Und mei Hos’ die war leer, wo de Baa emol warn
War ich froh, dass da kaaner bedauern miech kam
Bewaant oder net kimmt auf aans

Refr: Und de Band spielt Waltzing Matilda
Als mr de Trepp nogetrogn
Und se glotztn uns aa und es kam kaa Hurra
Wortlos habn se de Köpf eigezogn

5. Nu sitz ich auf mein Wägl, de Krück in dr Hand
Saah, wie se vorbeigezogn komme
Die alten Kameraden, wie se träume drva
Von den Glanz, den de Zeit ihn’ genomme
Do marschiern se noch emol so mü’, steif und siech
De Heldn von ’enn längst vergessenen Kriech
Und die gunge Leit die frägn siech desselbe wie iech
Fr was denn, frägt siech unneraans

Refr: Und de Band spielt Waltzing Matilda
Und die Alten stenne wieder bereit
Doch Jahr um Jahr da licht sich de Schar
Und aanst kimmt aa fr’n Letztn sei’ Zeit