Jordmorkari

Ein gamal jordmorkuffert stend til sides i ei krå
Med barselklutar lag på lag og mangt eit kjeringråd
Den skal kje lenger takast fram til hjelp mot verk og ve
For no er JordmorKari død og lagd i jordi ned

Og sungi hev dei grovt og grant slik gravferdsfylgje gjer
Og Brauti'n legg inn dubbel snus, her er så hustre ver
Og Olav Post hev vermt seg upp med drammar ein og to
For alle vil ha noko sagt til JordmorKari no

For det var ho som løyste dei ein gong i barselseng
Ho turka blod av blåe kinn, ho klypte navlestreng
Og somme kom med enden fyrst og somme kom med tang
Men alle skreik seg te eit liv i Karis jordmorfang

Ja høg og låg fekk same stell i Karis breie hand
Bå' Benny Boy forutan far og Johan utan land
Og han som no er ordførar han fekk ein lusing bak
Ho slo eit slag for livet her i mangt eit knipe tak

No er det sagt som seiast skal innved ei jordmorgrav
Men vesle Anne tenkjer høgt til far ved sia av
Får håpe då at englane i himmelen får små
Så JordmorKari dera au får litt å gjera på