Fare Schifo

So un mondo parfetìn fare schifo xe obligatorio
Dare fastidio pa ravivare un poco sto mortorio
Spie e lecacùi li dispresso dal profondo
Faxì schifo da soi, no gavì posto nel me mondo
Stima e rispeto no xe gratis, anca fazendo strapi
Nei me listati go forse tre laureati
Sarà un caso? No so, ma fa statistica
Pronto a na retifica ma in sta classifica no se quantifica
Titoi, cariche, lavoro, schei, sucesso
Poitica, reijon, lobbies che te dà calche acesso
No me ne ciàva un casso de sta xente insemenìa
Strenzo man a muràri veri, eà vera massoneria
Go un fià de açiditá! "Sarà a mosca dea sanbuca"
Sarà che mi go na fionda ma el governo ga un bazooka
Sensa na musa, sarveo che ruza, testa che bruza
Pi problemi de quanti na filosofia astrusa ne produza
Tre birini, meza cica e amaro
Un par de tramezini e dopo tuti al so ponàro
Parchè el tenpo me o spendo, no lo passo pi corendo
Eà me vita no la svendo, quindi ocio che te tendo
Me espando e me estendo, nel me canpo me ne intendo
So un mix del peso Sgarbi, D'Annunzio e Sheldon
Ma co ti xe tenpo perso, uno che se crede imenso
Daghe del buziaro al spècio che te riflete pa roverso
Mi so pronto col funk, rap, reggae inna di dance
Abituá rangiarme, deghe un tajo co e avances
No se ne fa pi gnente, go na serta nonchalance
Tanto te go xa mandà, no te ghe nessuna chance
No me fa miga paura l'inteigensa artificiae
Ma i omani sì co a deficensa naturae
Par quei go rime a sece che i fa sangue dae rece
No che a roba che stomega tipo dulse de lece
Quei dea musica bea che no capisse na capèa
Che me conta sta storièa da co ghevimo a cartèa
E che voe lavoro fisso ma boni de fare un casso
Che se lagna dei paroni e del stipendio massa basso
Ecco, se spiega a facia da casso che te ghe
Co te domandi parchè a 50 ani fasso el rap
Pa i bauchi come ti che me sbrindoea i cojoni
Però te inconconi senpre co i me boconi
E te dizi no so cossa co no so chi finchè no rivo
A sc-iafezarte ti e quea che parla in corsivo
So nervoso, no! Ma podarìa senbrare
Xe che me sento circondà da sta xente che va votare
E dopo messa in tratoria, in barba ai necrologi
Tre stinchi co e patate ma co e bache de goji
Tiramisù e sgropin: "Sarìa anca pieneto"
Do graspete e cafetìn co meza busta de Dietor
Xente che xe senpre in mezo a tuto e sa tuto
De tuti e de tuto, te i cati dapartuto
Dopo litri de bibite e pupile al limite
Difissie distinguerli dae piaghe bibliche
Stomeghi de goma mejo de na camerdaria
I magna 7 carbonare fate in frigitrice ad aria
A na serta i fa e rockstar pa do canoni al bar
I parla come Vasco e i finirà come Escobar
Xe un film in replica, società psichedelica
Più sostanse che sostansa e co na psiche endemica
Mi canbio abito a seconda de l'anbito
Passo dal sinpatico al mezo sociopatico
Doparemo pseudonimi, a situassion xe drastica
Co moro no vojo gnanca fiori de plastica
Cossa vuto faghe? No se poe piazerghe a tuti
Ma mi ve mando in cùeo anca se i tenpi se fa bruti
Vialtri vite tristi, pasqua modesta
Nialtri pasqua moesta e via festa
E anca sto ano ghe semo e come a volta scorsa
Mezanote de nadàe raudi e machine in corsa
Parchè femo schifo e anca un fià fastidio
Tute ste regoe insulse xe deventà davero un sidio
Parchè e bae xe rase, dentro e case se tase
E co e bae i ne foraja e mi questo no me piase