Ya Denya

يا حسرة عليك يا الدنيا فيك حكاية وحكايات
ساميني وقعدي حدايا واحكيهم لي بثبات
علاش هكذا حاقدة وسمية ظلي تبدلي في الصفات
تعذبي فيّ غير بشوية وعييت أنا من عذابك براكات

تلعبي بيّ ولّا معايا جاوبيني علاش هاذ السكات
قالوا لي عليك مسرحية وأنا المسرح سكن لي في الذات
والتذكرة خلصتها غالية ديت معايا شي وردات
دخلت للقاعة صفقوا علي طلع ستار والضو طفات
لقيت روحي في تمثيلية والديكور خوف من الأموات
طمعتيني ودرتي علي عندي جدي بصح مات

يا حسرة عليك يا الدنيا فيك حكاية وحكايات
ساميني وقعدي حدايا واحكيهم لي بثبات
علاش هكذا حاقدة وسمية ظلي تبدلي في الصفات
تعذبي فيّ غير بشوية وعييت أنا من عذابك براكات

شحال من سلطان كان في دنيا جيوش لأمره طيعات
مال ورزق قصور وسرايا العسة عليه بالألوفات
غفل غفلة نقلبت الحية حليلته ما صاب وين يبات
وكلتي فلان عسل وفاكية وفلان شمختي له الفتات
فلان قلعتي له الذرية وحياته من الفرحة خوات
وفلان طلق مرتو المسكية زعف كي جابت له البنات

يا حسرة عليك يا الدنيا فيك حكاية وحكايات
ساميني وقعدي حدايا واحكيهم لي بثبات
علاش هكذا حاقدة وسمية ظلي تبدلي في الصفات
تعذبي فيّ غير بشوية وعييت أنا من عذابك براكات

والمسجون يرجى الحرية بالدقيقة يحسب لوقات
والشهار يحلم بالشهرية يا حليله مولا وليدات
كبدة لميمة مشوية واش سهرت واش ربات
على وليدها بدل الجنسية عجبه زين الروميات
خلى يماه وحدانية من الحرقة والبكا تعمات
وباش يبين الرجولية بعث لها زوج محرمات

يا حسرة عليك يا الدنيا فيك حكاية وحكايات
ساميني وقعدي حدايا واحكيهم لي بثبات
علاش هكذا حاقدة وسمية ظلي تبدلي في الصفات
تعذبي فيّ غير بشوية وعييت أنا من عذابك براكات

نهار كانت الدنيا دنيا الوالدين علقوا لهم شعارات
واليوم الوالدين راهي مرمية في مراكز الشيخوخات
إنت دنيا يدك زهرية وأنا يدي فيه الكيات

مع الواقف درتي جمعية سماها دخلات وخرجات
والقليل بعثتي له خطية جا يصلي تلفت له الصلاة
وكي سلم انسى التحية وكي تحى نسى زوج ركعات

يا حسرة عليك يا الدنيا فيك حكاية وحكايات
ساميني وقعدي حدايا واحكيهم لي بثبات
علاش هكذا حاقدة وسمية ظلي تبدلي في الصفات
وتعذبي فيّ غير بشوية وعييت أنا من عذابك براكات

دعوة الوالدين رسمية منهم الشر والخيرات
الهنا كنز والصحة غالية والباقي كله كذوبات
ياسين ارسلها تحية وامضى فيها بشي دمعات
بعثها لكمال مسعودي برية قراها بوتار وألات، الله يرحمك
والصلاة على نور عينيّ سيد الخلق ويا سدات
وشكون نجا منك يا دنيا غير اللي طلقك بالثلات

يا حسرة عليك يا الدنيا فيك حكاية وحكايات
ساميني وقعدي حدايا واحكيهم لي بثبات
علاش هكذا حاقدة وسمية ظلي تبدلي في الصفات
تعذبي فيّ غير بشوية وعييت أنا من عذابك براكات