Chanterai Por Mon Corage

Chanterai por mon corage
Que je vueill reconforter
Car avec mon grant damage
Ne vueill morir n'afoler
Quant de la terre sauvage
Ne voi nului retorner
Ou cil est qui m'assoage
Le cuer, quant j'en oi parler.
Dex, quant crieront 'Outree!'
Sire, aidiés au pelerin
Par cui sui espaventee
Car felon sunt Sarazin.
Soufrerai en tel estage
Tant quel voie rapasser.
Il est en pelerinage
Dont Dex le lait retorner!
Et, maugré tot mon lignage
Ne quier ochoison trover
D'autre face mariage
Folz est qui j'en oi parler.
Dex, quant crieront 'Outree!'
Sire, aidiés au pelerin
Par cui sui espaventee
Car felon sunt Sarazin.
De ce sui au cuer dolente
Que cil n'est en Biauvoisis
Qui si sovent me tormente
Or n'en ai ne gieu ne ris.
S'il est biaus et je sui gente
Sire Dex, por quel feïs?
Quant l'uns a l'autre atalente
Por coi nos as departis?
Dex, quant crieront 'Outree!'
Sire, aidiés au pelerin
Par cui sui espaventee
Car felon sunt Sarazin.
De ce sui en bone atente
Que je son homage pris.
Et quant la douce ore vente
Qui vient de cel douz pais
Ou cil est qui m'atalente
Volentiers i tor mon vis
Adont m'est vis que jel sente
Par desoz mon mantel gris.
Dex, quant crieront 'Outree!'
Sire, aidiés au pelerin
Par cui sui espaventee
Car felon sunt Sarazin.
De ce sui mout deceüe
Que ne fui au convoier
Sa chemise qu'ot vestue
M'envoia por embracier.
La nuit, quant s'amors m'argue
La met delez moi couchier
Mout estroit a ma char nue
Por mes malz assoagier.
Dex, quant crieront 'Outree!'
Sire, aidiés au pelerin
Par cui sui espaventee
Car felon sunt Sarazin.