Текст песни

Nte me penzeri fabbricai na villa
Chi nto pajisi è una di cchiu belli
E nta l'entrata disegnai na stilla
Cu sfumi azzurri e li bordi russelli

Non c'e cancellu e mancu recinzioni
Trasinu sulu li belli cristiani
Se ccu rispettu e ccu educazioni
Sarannu accolti ccu me cori e mani

Quandu t'affacci vidi l'Asprumunti
Un quadru di un pitturi assai importanti
Ti giri e vidi lu mari di frunti
Cu tanti barchicelli galleggianti

Riapru l'occhi e non vijiu cchiu nenti
Era un penzeru di chilli vaganti
Passai pe tutti un nulla facenti
Ma nta me vita eu ngrassai a tanti

Ma pe sti cosi non portu rancori
E mancu si lu vogghiu rinfacciari
Chillu chi fici mu mponiu lu cori
Ndajiu nu cori cchiu grandi di lu mari

Restai sempri lu stessu e omu sugnu
Non fici azioni pemmu mi vrigognu
A cui rispetta lu cori si dugnu
Porgiu la manu a ccu avi bisognu