Morungens Liebeslied

Ich hôrte ûf der heide
Lûte stimme und süezen sanc
Dâ von wart ich beide
Vröiden rîch und trûren kranc
Nâch der mîn gedanc
Sêre ranc unde swanc
Die vant ich ze tanze dâ si sanc
Âne leide ich dô spranc
Ich vant si verborgen
Eine und ir wengel naz
Dô si an dem morgen
Mînes tôdes sich vermaz
Der vil lieben haz
Tuot mir baz danne daz
Dô ich vor ir kniete dâ si saz
Und ir sorgen gar vergaz
Ich vant si an der zinnen
Eine, und ich was zu ir gesant
Dâ moht ichs ir minnen
Wol mit fuoge hân gepfant
Dô wânde ich diu lant
Hân verbrant sâ zehant
Wan daz mich ir süezen minne bant
An den sinnen hât erblant