Palomma

Palomma te chiammava mamma toja
Palomma e ne faceva lacremelle
"Chella nun sape 'a casa soja
Sempe cumpagne e cumpagnelle"
E comm'a na palomma tu facive
E a scola e add"a maesta nun ce jive

Ciento 'nnamuratielle appriesso a te
E nce 'ncappaje pur'i senza vulé
Palomma, palomma ca vuole
Tu cagnanno nu sciore pe' n'ato
Si truove quacche sciore avvelenato
Fernisce 'e vulá

Palomma e st'uocchie nire erano stelle
Nu manto 'e seta sti capille nire
Ma addó passava cu sti scelle
Erano lacreme e suspire
Anfino ca, nu juorno, pe' destino
Te 'ncapricciaste cu nu signorino

Ma cu nu signurino 'e chilli llá
Ca penzano a fá diébbete e a ghiucá
Palomma, palomma ca vuole
Tu cagnanno nu sciore pe' n'ato
Si truove quacche sciore avvelenato
Fernisce 'e vulá

E chillo ca giuraje ca te spusava
Na casa t'affittaje 'ncopp"e quartiere
E po', truccata, te mannava
'Mmiezo Tuledo tutt"e ssere
Aggiu saputo ca mo staje malata
Fort'è si 'a tire 'nnanze 'sta vernata

E chillo ch'avri"a stá vicino a te
Sta nott'e ghiuorno 'int'a nu tabarè
Palomma, Palomma che pena
Penzanno all'ammore passato
Mo ch'he truvato 'o sciore avvelenato
Nun può'cchiu' vulá

Mo ch'he truvato 'o sciore avvelenato
Nun può'cchiu' vulá