Verbositeit

Ik komn van wal steken met verbositeit die steek oedt
Kbringn je da type naturel da niemand in je streek doet
De streken dak in me regels steken zien sluw en vossig
Ruw en bossig, utgedokterd lik et medische geneesboek
T'verhaal nimt je up reize mee, me bek pekt de weg los
De flow is e tornado das de reden dat de track tocht
De wind woait zelden grovver
Tis hypnose, gevangn in e storm, lik e Pink Floyd album cover
Met ieder zinne ist lik dak voet up de moane zetten
En komof maken met limieten en bestoande wetten
Breken deur et paradigma dat us bestoan beperkt
E nieuwe wereld scheppen lik e rover die locoaties scant
Der groeit kosmos up de celestiële levensboom
En transport up je innerlijke metronoom
Das de reden daj automatisch vervoerd wordt
Je trein der gedachten is ontspoord lik in e lege droom
Tmoment dat je ontroerd wordt, lik e kapitein
Die voe de latste ki van ze leven achter et roer stoat
Niemir up jacht, tmoment daj olles los lat
En ontspant ist lik of daj voen eerste ki etwot snapt
Oj bot vangt moejt archeologisch bekijken
Ieder onbekende schakel ku je mogelijks verrijken
Schakelt dus e tandje hoger, drie vitessen rapper
Spitst jen oorn, en lat et betekenisloze achter
Ik spuugn bars terwijl dan andern in bars spuugn
K'tartn t'Lot en kun azo e bijbelse pilaar buigen
Zout da wel gepast zien ok ik toveren lik Obelix
Met de flow boven olles toren lik e obelisk
Of is da hoogdravend lik de vier ruiters van de Apocalyps
Ok schrieven dak lyrisch een aureool dragen
Zie me met regelmoat up elke moat e regel regeln
Moat, k'regeln moatregels, gif me zeven wegels
En ik bouwen der elk e Rome achter, oj me mo tied gift
Mo woarom zoek da bouwen ot upt ende ol voe nix is
Der zit et Caesar of Brutus in elke Cicero
En elk moment bevat in essentie ook ieder risico
Elke gokker et wel af en toe e hippodroom
Iedere schriever ontdekt wel ooit e nieuwe idioom
Iedereen die olles haat wos ooit wel eki filantroop
En idealiter is ieder af en toe een idioot
Die visie strookt met de gedachte dat absurditeit
Absurd moe bluvn, nie weggemoffeld in obscuriteit
Mor openboar anverd, de norm is nie normaal
Mo uitgesproken, ofwijkend, tegendroads en marginaal
Met elke tekst manifesteer ek e gedachtegang
Reflecterend componeer ek vlug e masterplan
Probeer ek up de tast de drang te eren die em vasteklampt
Me inspireert toet et faciliteren van de mafste klankn
Tis intrigerend oe da taal me doet toet rust komn
Zo penetreer ek in verhaaln toet dak bewust wordn
Olles et e reden ook de dood komt nie azoma
Want de zin van't leven endigt nie met e punt mor e komma
Dus genereer ek t'maximale lik e trustfond
En infilteer ek radicaal toet diep in e geluksbron
Olles et e reden ook het leven bluft e zegen
Want de zin vant olles start energiek met een utroepsteken
Overvloed ontstoat in essentie ut e gebrekkigheid
De mens is adaptief, e meester in behendigheid
Mor toch ist nie zo evident in te blendn in de gekkigheid
We zitten tope in een omgekeerde kooi van Faraday
Kinders en nu, Tiktokkers als rolmodel
Pickpocket de jeugd van under dromen
Met een ordinair poppespel, lik e kolonel
Die moe ze volk vertellen dat et geluk van korte tel is
Plots geweld in zicht, de fontanellen gesplit en were toegeplakt
Ieder pion upt bordespel geveld, de spelers moegemakt
Dus oftewel kom et vanzelf wel goed, is de route hard
Of klopt den helft van woa daw in geloven nie en moet et barstn
Soms willek symbolisch etwa benoaderen
Want rechtut is de woarheid vaak te negatief beloaden
En vaak nie eens te geloven, Virginia Woolf
De realiteit is zoveel zotter dan da fictie ooit ku hopen
Te zien, dus vlucht ek af en toe in tekst weg
Doar droai et nie om wa daj doet of echt zegt
Ken mezelvn nie leren kennen
De illusie van zelf is verdwenen upt moment dak echt leerde luisteren no me stem
Ik voeln de letters echt lik dak ze nerepennen in braille
Up de tast gok ik verder, upt ritme van me medaille
Oj luistert no me gedichten
Goj begrijpen dat bars voe mijn de wijze zijn woarup dak et duistere kunnen verlichten
Das e feit, ze komn up jen of lik lawines
En ik kneedn letters lik of da ze gemakt zien van plasticine
Hermetische kleitabletten druipend van't alchemisme
Ieder spatie is berekend, passend int algoritme
Al die typische benoaderingn zienk kotsbeu
Stikt der liefde in en got deur merg en been lik e botbreuk
Oeveel dajt ook opleukt
Want ol draagt een aap e gouden ring, swingt ie rappe no beneden lik e wolkbreuk
Knimn je tijdelijk up stap nor ander oorden
Af en toe ej nood an ander flows en ander woorden
Af en toe zoej liefst nie ik, mo wel een ander oorn
Ak zoen kunnen toen deed ek me voe joen ier lik een ander voorn
Mo da goa nie, ik kunnen uitsluitend authentiek zien
Dus rap ek wuk dak ik up da moment et meest uniek vien
Soms simpel soms complex
Soms zinvol en soms onbetwist extraordinaire onzin
Et literaire evenwicht et ier de sleutelrol
En passie voer et vak mak et proces olvast geneugtevol
Dus ik, genieten onderweg met vulle teugen
Ol ant vieren vo da we zien vertrokken up uze vreugdesgolf
Soms trek et leven me verassend ut men evenwicht
Mor e beat lik dezen is ossan e zuiver tegengif
Tegen ol da me tegenzit, tegen de tijd dak meezien met olles
Ziek dak de tegenwoordige tied int verleden zit
En kholln mezelvn achterna gelik e speelse hond
Kzien vierendertig joar, da zien ol veel seizoenen
En sinds dawe augustus zien ist zeker gek
Te weten dat er sinds me geboorte in totaal exact
Oenderdzevendertig gepasseerd zien, sinds dak ier gekomn zien
Soms klopt olles, lik daw ollemaal verbondn zien
Soms is olles lik dat is en nietn extra
En vaak is da genoeg voer e kwalitatieve impact