Vöslauerstraße 80

Er is ochzg und sie is siebzg
Er hot scho a Schlagerl g'hobt
Liegt seither im Bett
Södn dass er redt

Sehr oft is sei Leintuch noss
Maunchesmos do mocht a gross
Ins Bett
Södn dass er redt

D'Sau hot se schon wieda aungschissn
Sei Oide hot de Fensta aufgrissn
Es Klo is aum Gaung
Sie putzt ois in Kübl
Geht söwa no drauf
Trogt 'n ausse dem Nochborn wird übl

Sie kaunn fost nimma kräuln
Bevors vahungan und nocha dafäuln
Zahts es Fressn auffe in drittn Stock
De koihn trogts sticklweis in ihrm Rock

Er is ochzg und sie is siebzg
Er hot scho a Schlagerl ghobt
Liegt seither im Bett
Södn das er redt

D'Leit haum sei Frau a poor Tog net g'segn
San vor da Tir g'staundn und hom g'rochn
Jessas Maria, vielleicht is wos g'schegn
Es riacht noch Scheiße und ois hätt ana brochn

Und no wos so a komischa G'ruch
G'rod so wia waunn ana dafäult
Haums de Kiwara g'ruafn is ana von de
Bei da Obaliachtn einekräult

In da Kuchl haumsas g'fundn de oide Frau
In da Händlsuppn do is si g'schwumma
A Schlagerl hots g'hobt, des siech i genau
Sogt da Dokta der späta is kumma

Im Schlofzimma haums ihrn Maunn g'fundn
Gaunz dünn worn seine Händ
A Serviettn um an Hals umbundn
Dabei wor sei Fressn schon längst vabrennt

De Augn und den Mund weit offen
So ois hätt er no g'wort
Dass erm vom Himme wos zum fressn
Ins Mäu einefohrt

Er wor ochzg und sie wor siebzg
Beide haum a Schlagerl g'hobt
Liegn im Totenbett
Wo kana mer wos redt

Und in da Zeidung irgendwo in da Mittn
Steht
Vöslauerstraße 80
A Wohnung zu vamietn