ما تستعجبش ما تستغربش

ما تستعجبشي، ما تستغربشي
في ناس بتكسب ولا تتعبشي
وناس بتتعب ولا تكسبشي
ما تستعجبشي، ما تستغربشي

ما تستعجبشي، ما تستغربشي
في ناس بتكسب ولا تتعبشي
وناس بتتعب ولا تكسبشي
ما تستعجبشي، ما تستغربشي

وارث وله كام ألف جنيه
وده غير يا سيدى خمس عمارات
يجى بسلامته أسم الله عليه
يعشقلى واحدة بنت صالات

سعادة البيه، جوا الكباريه
ولع سيجارتها بعشره جنيه
تضحك في عينه وتكروت فيه
وتقوله هاتلى أبصر إيه

فلوس وجاتله يا ناس بلاش
وليه بقى ما يجبلهاش
وهي تكسب ولا تتعبشي
وهو يخسر ولا يكسبشى
وأهو ناس بتكسب ولا تتعبشي
وناس بتتعب ولا تكسبشي
ما تستعجبشي، ما تستغربشي

ما تستعجبشي، (آه) ما تستغربشي
في ناس بتكسب ولا تتعبشي
وناس بتتعب ولا تكسبشي
ما تستعجبشي، ما تستغربشي

وأدي واحد تلميذ خيبان
شوفوا وجاهته بقى وبصوله
يشرب خمره كمان دخان
وفي مدرسته بليد على طوله

فى الغرميات يكتب جوابات
لو تقرا فصاحته تقول يا سلام
وفي التاريخ ينزل تلبيخ
ولا يعرف سته في سته بكام

وأبوه مسكين مهدود حيله
ده بيتعب نفسه ويديله
وكل ده ولا بيأثرشي
وأبوه بيخسر ولا يكسبشي
وأهي ناس بتتعب ولا تكسبشي
وناس بتكسب ولا تتعبشي
ما تستعجبشي، ما تستغربشي

ما تستعجبشي، (آه) ما تستغربشي، (آه)
في ناس بتكسب ولا تتعبشي
وناس بتتعب ولا تكسبشي
ما تستعجبشي، ما تستغربشي

وأتنين ووجها من الأعيان
غاويين يا فندم لعب قمار
يقضوا طول الليل كونكان
تقولش يعنى ما بنهم طار

فولان كسبان وفولان خسران
وتشوف العكس الليلة التانية
خساره طوالي كل الليالي
وصاحب النادي له على الميه

ويخبط عمولته المعتاده هيهمه إيه، لا ده ولا ده
يفضل في مكسب ولا يلعبشي
يعمل في أولوفات ولا يتعبشي
وأهو ناس بتكسب ولا تتعبشي
وناس بتتعب ولا تكسبشي
ما تستعجبشي، ما تستغربشي

ما تستعجبشي، ما تستغربشي
آه، في ناس بتكسب ولا تتعبشي
وناس بتتعب ولا تكسبشي
ما تستعجبشي، ما تستغربشي