Huia Kaimanawa

Kōrihi ana ngā raukura o te wao
Tomokia atu te urutapu nui
Tapu te rongo
Tiori mai tō reo rōreka
Mai i te tihi o te tōtara

Kō atu au ki a koe i te kōawa
Tūtakitaki kē ki te manu huna
Tapu te rongo
Korowhio mai ana
Hei hoa haere

Kei taku huia kaimanawa
Kura matahīapo
Rongo tonu ana i tō karanga
Kātahi te kōingo

Rapu tonu i te hāpua tōtara
I te tōmairangi o te nehenehe
Tapu te rongo
Tākina mai tō mata
Ō puoro

Tukua tō reo ihirangaranga ki te ngahere
Iere mai te tini o te hakuturi
Tōiri mai tō rongomaiwhiti kia waiatatia
Tākiri mai ko te ata ka ao ka awatea

Kei taku huia kaimanawa
Kura matahīapo
Rongo tonu ana i tō karanga
Kātahi te kōingo