Bahar Aayee

بہار آئی تو جیسے یک بار
لَوٹ آئے ہیں پھر عدم سے
وہ خواب سارے، شباب سارے
جو تیرے ہونٹوں پہ مر مٹے تھے
جو مٹ کے ہر بار پھر جیے تھے

نکھر گئے ہیں گلاب سارے
جو تیری یادوں سے مشک بو ہیں
جو تیرے عشاق کا لہو ہیں
بہار آئی

ابل پڑے ہیں عذاب سارے
ملالِ احوالِ دوستاں بھی
خمارِ آغوشِ مہ وشاں بھی
غبارِ خاطر کے باب سارے
تِرے ہمارے سوال سارے، جواب سارے

بہار آئی تو کُھل گئے ہیں
نئے سرے سے حساب سارے
نئے سرے سے حساب سارے
بہار آئی
بہار آئی