Una Manera D'Esse Un Omu

Ci ai insulcatu l'arte di sapè cantà
A lingua di li nostri, i versi muntagnoli
Ore eppo ore sane eri tù a imparà
A noi ghjuvanotti di corsica figlioli
Una manera d'esse un omu

Ci ai fattu riflette à u veru campà
Da nutrisce cun tè d'issa terra le vene
Ore eppo ore sane ci dedi à sunnià
A noi ghjuvanotti cun fiatu pè l'avvene
Una manera d'esse un omu

Ci ai datu lu sensu di l'umilità
Senza rigiri falsi di u parlà sinceru
Ore eppo ore sane eri tù à imparà
A noi ghjuvanotti incù passione è fieru
Una manera d'esse un omu

Ci ai indittatu un chjassu quellu di milità
Per u populu nostru per le nostre surghjente
Ore eppo ore sane ci dedi à impastà
A noi ghjuvanotti cun sincera sumente
Una manera d'esse un omu

Ci ai impostu l'assenza quellu ghjornu o natà
Lasciendu le to chjave è una porta aperta
A noi avà la scelta d'entre ci è suvità
A strada ch'era a toia, è l'andatura offerta
A noi avà la scelta d'entre ci è suvità
A strada ch'era a toia, è l'andatura offerta
D'una manera d'esse omi