La Pura

Miu bab ei in pur e la mumma ei pura
Culs mauns rubigliai dil luvrar.
Ed jeu, lur affon, vi nuot esser signura,
Na, pura vi jeu daventar.

Tgei biala, sublima, gie sontga clamada
Ei franc il puresser, capiu.
De tuttas l’emprema eis ella gie stada,
A nus dictada da Diu.

Tgei dat ei pli bi, che nossa cultira
Da temps primavaun contemplar,
Mo brumbels e fluras, schi lunsch sco ins mira,
D’aviuls ed utschals lur cunfar.

La stad dat ei bein enqualina suada,
Stentusa e greva lavur.
Finfatg nus duvrein lu negina pumada
Per dar allas vestas colur.

E per igl atun, la raccolta finida
E tut ei a tgiembel sut tetg,
Pleins ei il clavau, e la cas’emplenida.
Quei ei in grondissim deletg.

E vegn il unviern cun sia ferdaglia,
La sera en stiva filein,
Ei maunc’a nus mai cumpignia de vaglia,
Las veglias canzuns nus cantein.

Perquei jeu selegrel de mia clamada,
E less cun negin baratar,
E pura sco mumma adina ei stada
Senz’auter vi jeu daventar.