Langstross

Langstross, du bisch dia schönschti Gass
vum Schnee ganz wiss, vum Räga nass
dini rot und grüana Liachter lüchten üs der Wäg
graduf, gradab und höllisch schräg

liicht wia frischi Wäsch im Wind
und haiss wia Pech sind dini Kinder
Chrischta, Buddhischta, Juda, Moslem, Hindu-Inder
uf da Balkön läben Hüaner, Lämmer, Rinder
du selber losch dia goldiga Kälber los
Reklama fallen ab da Dacher üs in Schoss

dini Wünsch und Wunder färben alli Wunda rosarot

Langstross, du bisch dia schönschti Gass
bittera Zucker und salziga Spass
dr Asphalt glänzt im Morgagrau wia neu
dini Nodla glitzren gheimmsvoll im Heu

mit fahriga Finger behelfen sich zwai
da Kirchturmschläg isch’s einerlai
erschienen dini Junga, so verschwinden dia Alta
dia ainta müands suacha, dia andra wennds bhalta
du trucksch für jeda dini Auga zua
vu Platz zu Platz schicksch Erlösig und Rua

dini Wünsch und Wunder färben alli Wunda rosarot

Langstross, du bisch dia schönschti Gass
gschlissani Schtrümpf und Huut ganz blass
jedem gisch, wenns dringend isch, öpis wona tränkt
wail usser diar jo niemert meh ans Schenka tenkt

durch dini schmala Hüfta zitteret der Föhn
du schiabsch für üs d’Autos, segnisch üsari Söhn
hailigsch dini Töchter und dia staubig Erda
was hüt nit isch, das könnt no werda
kai Hahn wo kräht, wenn d’Sunna kunnt
im Hintergrund do bellt en Hund

dini Wünsch und Wunder färben alli Wunda rosarot

Langstross, du bisch dia schönschti Gass
an diar klebt no Hoffnig, und drüber wachst Gras
noch Mitternacht sind Jodler uf der Pirsch
und in der Tunnelröhra waidet grad dr Hirsch

drüber tonneret der Zug nach sowieso in d’Welt
as blitzt und haglet grad wie bschtellt
im fahla Mondliacht wimmeret a Kind
wenn d’Glais im Nachtfroscht funklig sind
gisch dina Freia meh Minuta inara Schtund
Gier wird Hab und Guat wird Schund

dini Wünsch und Wunder färben alli Wunda rosarot

Langstross, du bisch dia schönschti Gass
Schach und Matt und Jazz und Jass
lisisch us der Hand und klapprisch mit da Türa
tailsch dina Kutta, kaina söll früra

bisch an ainzig wilda Zaubergarta
in jedem tota Winkel gseht ma Engel warta
und schreits au us der Siitastross
mit Gnadastoss im Nochbershuus
es luagen all dia zwungana Maitla druus
im Liachtschacht ligt en Rosaschtruss

dini Wünsch und Wunder färben alli Wunda rosarot