Grendahusvalsen

No er granbaret strødd på trammen, no er dukane lagt på bordet
No er godtfolk og alle sammen ønskt velkomen, og no syng koret
Syng om lerka, syng om våren, så ein gråstein kan ta te tåren'
Det er stemning, det er laurdag, og det er grendelagsfest

Og ho Gunnhild og Mari hass Jo
Står som vanleg på kjøkenet no
Smører skiver og legg dei på fat
Så det blir til kaffimat

No kan Olav gå fram på scena og lesa diktet han sjøl har dikta
No syng Astrid om Skjøn Helena som var trufast men som blei svikta
Og Johansen den galne skrotten kjem med skrøner og får opp låtten
Så kan alle synge saman og dra stolen til bords

Og ho Gunnhild og Mari hass Jo
Kjem i bunad og låghæla sko
Og kan dele ut egg og ansjos
Og litt søtt til kaffikos

Og når alle har nok i magen då kan kvendi få ta av bordet
Men før karane ryddar salen vil han Olav få be om ordet
Han vil sei litt om mat og bite, og til dei som har bakt og slite
Vil han gje eit takk for maten med ein kraftig applaus

Og ho Gunnhild og Mari hass Jo
Dei er glad dei iallfall er to
Som kan dele på bifallets brus
Før dei gjeng og vaskar krus

Og i såpe og lunka vatn blir det blåe seviset turka
Dei kan høyre den glade skratten frå ein toraden med masurka
Men når dei to vil prøve dansen og få svingt litegrann på svansen
Då er siste leiken låten, og det var damenes vals

Og så må Gunnhild og Mari hass Jo
Køyre gubben sin heim og til ro
Og når me skal ha fest her på ny
Veit me kven me helst kan bry