Cara Santa Lusia

Tra li carti d'an caset
D'an cumò d'al mè bisnono
U catà a tsè par casö
An foi vec e g'era scrit
"Cara Santa Lusia
che ghè quel ca quadra mia
Al l'e mia al campanel
ne l'asnel gnianca l'to bel"
In s'al foi ca t'u lasà
G'era scrit tanti bilin
Ma u catà pena n'turon
E na brancada ad mandarin
Quand me madar la m'a vist
Ca gridavi cmè n'pursin
La m'a det par cunsulam
"La t'a mia mandà l'carbon"
Ma l'dè dopo sum andà
A sugar da me cusin
Quanti sög a t'ghè portà
G'nera anca par i psin
N'cararmà, na machinina
Na mitraglia, i suldatin
An subiol, na bicicleta
Na sunina d'mandulin
Sum armast sensa parole
G'era anca na pistola
E na scatola dorada
Tuta piena d'ciculada
Me ma dmandi ümilment
Cus a l'fat püsè che me
Se a scöla l'è n'somari
E l'sta föra tut i dè
A su pena che so padar
L'è pien d'soldi e l'g'ha l' lachè
Al mei 'nveci l'fa mai festa
Al ven gnianca a ca a mesdè
A magnar n'ton da mnestra
Ades dimal te parchè
Na rason la m'la son fata
L'è n'bel pö ca g'pensi söra
L'an ca vegn fam an piaser sta pu vegnar cl'è pö ora
Pena cati i to' bilin
Dai a n'atar bel putin
Parchè incö a son gnì grand
E gnarò mai pö p'i snei