Tra Di Noi

Passata hé più d'una stonda
corse le nove senza aretta,
u mondu va di a so ronda
è tempu vene à chi l'aspetta,
po sò venute tante chjame
da u vicinu è u landanu
sempr'à imbellisce e mio brame
sott'à un celui paisanu,
è cum'è l'acqua muntagnola
chi vanu à rinfrescà u sole,
ne vengu oghje à u calore
ch'ellu mi manda u vostru core...

E si da voi era aspettatu
ti vogliu di, mi si mancatu,
E si da voi era chjamatu
ti vogliu di, nunda hà cambiatu...

Noi sapemu chi a vita
si ne scola cum'un veranu,
u tempu stringne à temp'avvita
cù chjavi chè n'avemu un manu,
allora quandi u chjassolu
a ci canta in versu ribellu,
fussi chè per un passu solu,
si ne scappa più d'un zitellu,
ma di vultà par'è listessu,
sol'à lu veru l'hè cuncessu,
u nostru silenziu era intesu
à fil' di cantu sempre tesu...

E si da voi era aspettatu
ti vogliu di, mi si mancatu,
è si da voi era chjamatu
ti vogliu di, nunda hà cambiatu...

Ci basta una melodia,
cùn duie note è qualchi rima,
pè discitanne l'allegria
è ritruavacci più chè prima,
di ritruvassi pè cunvene,
quandu lu cant'à nodi ci léa
ma pè dà sempre cappiu lene,
à ogni sonniu è ogni idea...

E si da voi era aspettatu
ti vogliu di, mi si mancatu,
è si da voi era chjamatu
ti vogliu di, nunda hà cambiatu...