ទឹកភ្នែកប្រពន្ធបង

I.ធ្លាប់គិតថាអូន ជាមនុស្សស្រីមានសំណាង
ព្រោះមានបងអះអាង បងធានារ៉ាប់រងគ្រប់សព្វ
ទោះទ្វីបលោកប្រួលប្រែ វដ្តនៃផែនដីបញ្ចប់
ចិត្តស្នេហ៍មិនប្រែជាស្អប់ មិនត្រលប់បោះបង់អូនឡើយ។

II. គ្រប់ស្នាមញញឹម មានត្រឹមមួយរយៈពេល
ដូចព្រះអាទិត្យជ្រៀងជ្រេ ព្រោះបងប្រែលែងដូចមុនហើយ
បងគ្មានអ្នកថ្មី  ឬងប់ស្រីដទៃឡើយ
តែប្ដីសម្លាញ់អូនអើយ បងបែរជាងប់ងុលនឹងល្បែង។

R. បងលែងក្រែង បងលែងខ្លាចចិត្តប្រពន្ធ
គ្មានពេលថែអូនដូចមុន ពាក្យទន់ភ្លន់
ប្រែល្វីងដូចស្លែង
បំផ្លាញលុយឡាន លក់អស់ដីផ្ទះសម្បែង
រស់នៅក្នុងភាពវង្វេង លែងស្គាល់ខុស លែងស្គាល់អ្វីត្រូវ។

III. ទឹកភ្នែកប្រពន្ធបង ហូរកាត់ថ្ពាល់រៀងរាល់ថ្ងៃ
ជីវិតរសាត់បាត់ន័យ ដូចផ្កាយពេលថ្ងៃសូន្យពន្លឺ
យំព្រោះរំភើប ត្រូវប្ដូរមកយំព្រោះឈឺ
រស់រាល់ថ្ងៃដូចសំពៅ  ដែលធ្លុះធ្លាយរង់ចាំថ្ងៃលិច៕