Kirpaan

ਮੈਨੂੰ ਕਿਹਾ ਭਗਾਉਤੀ ਗੁਰਾਂ ਨੇ , ਮੈਂ ਕ੍ਰਿਪਾ ਦੀ ਹਾਂ ਆਨ
ਮੈਂ ਜਬਰ ਤੇ ਜੁਲਮ ਨੂੰ ਰੋਕਦੀ, ਮੇਰਾ ਨਾਮ ਤਾਂ ਹੀ ਕ੍ਰਿਪਾਨ
ਮੈਦਾਨੇ ਜੰਗ ਦੇ ਸਫੇ ਤੇ , ਮੇਰੇ ਨਾਲ ਹੋਣ ਇਮਤਿਹਾਨ
ਅੱਵਲ ਉਹੀ ਸੂਰਮੇ ਜੋ , ਕੱਢਣ ਵੈਰੀ ਦੀ ਜਾਨ ,
ਮੈਨੂੰ ਕਿਹਾ ਭਗਾਉਤੀ ਗੁਰਾਂ ਨੇ , ਮੈਂ ਕ੍ਰਿਪਾ ਦੀ ਹਾਂ ਆਨ

ਹਰਗੋਬਿੰਦ ਸੱਚੇ ਪਾਤਸ਼ਾਹ , ਮੇਰੇ ਵਿੱਚ ਵੱਸੇ ਨੇ ਆਪ
ਦੋ ਰੂਪ ਸੀ ਦਿੱਤੇ ਉਨਾਂ ਨੇ , ਮੀਰੀ ਤੇ ਪੀਰੀ ਥਾਪ
ਇਤਿਹਾਸ ਦਾ ਰੁੱਖ ਸੀ ਬਦਲਿਆ , ਗੁਰੂ ਸਾਹਿਬ ਮੇਰੇ ਨਾਲ਼
ਕਰਨ ਨਾ ਦੇਣਾ ਜੁਲਮ ਹੈ , ਮੈਂ ਮਜਲੂਮਾਂ ਲਈ ਢਾਲ਼
ਬਾਬਾ ਬਿਧੀ ਚੰਦ ਮੇਰੇ ਨਾਲ਼ ਹੀ, ਯੁੱਧ ਲੜੇ ਘਮਸਾਨ

ਮੈਂ ਕੋਲ ਸਾਂ ਗੋਬਿੰਦ ਰਾਏ ਜੀ , ਜਦੋਂ ਲੱਗਾ ਸੀ ਆ ਬਾਣ
ਮੈਂ ਬਾਣ ਸੀ ਬਣਕੇ ਗੁਰਾਂ ਦਾ, ਕੀਤਾ ਵੈਰੀ ਦਾ ਘਾਣ
ਚਮਕੌਰ ਗੜੀ ਵਿੱਚ ਚਮਕਦੀ, ਰਹੀ ਵੱਖੋ ਵੱਖਰੇ ਹੱਥ
ਮੈਂ ਆ ਅਜੀਤ ਝੁਜਾਰ ਕੋਲ਼ , ਜੌਹਰ ਦਿਖਾਏ ਅਕੱਥ
ਔਖੇ ਵਕਤ ਸੀ ਰੱਖ ਲਈ  , ਚਾਲੀ ਸਿੰਘਾਂ ਦੀ ਸ਼ਾਨ

ਬੰਦਾ ਵੈਰਾਗੀ ਸਾਜਿਆ, ਜਦੋਂ ਆਪ ਗੁਰਾਂ ਨੇ ਆ
ਖਾਤਿਰ ਜੁਲਮ ਮਿਟਾਉਣ ਦੇ , ਉਸ ਹੱਥ ਦਿੱਤਾ ਪਕੜਾ
ਜ਼ੁਲਮਾਂ ਦਾ ਉਹ ਜਾਂਵਦਾ, ਕਰਦਾ ਦੂਰ ਹਨੇਰ
ਜੋ ਜਾਬਰ ਰਾਹ ਵਿੱਚ ਆਂਵਦਾ , ਉਹ ਵੱਢ-ਵੱਢ ਲਾਉਂਦਾ ਢੇਰ
ਨਰਕਾਂ ਦੇ ਵੱਲ ਤੋਰਿਆ ਈ ਓਹ ਵਜੀਰਾ ਖਾਨ

ਦੋ ਹੱਥ ਨਈ,ਪੰਜ ਹੱਥ ਕਰ ਰਿਹਾ  , ਪੰਜ ਹੱਥਾ ਉਹਨੂੰ ਕਹਿਣ
ਨਲੂਏ ਨੂੰ ਤਾਂ ਦੇਖ ਕੇ ਸੀ , ਹੋਣੀ ਪਾਉਂਦੀ ਵੈਣ
ਓਹ ਸ਼ੇਰ ਅਕਾਲੀ ਗਰਜਿਆ , ਵੈਰੀ ਨੂੰ ਗਸ਼ੀਆ ਪੈਣ
ਜਦੋਂ ਕਰੇ ਅਟਾਰੀ ਵਾਲੜਾ , ਤਾਂ ਵਾਰ ਨਾ ਗੋਰੇ ਸਹਿਣ
ਮੈਂ ਹੀ ਉੱਚੀ ਕਰ ਗਈ , ਸੀ ਸਿੱਖ ਰਾਜ ਦੀ ਸ਼ਾਨ

ਜਿੰਨੇ ਆਏ ਧਾੜਵੀ , ਜੁਲਮਾਂ ਦੀ ਲੈ ਤਲਵਾਰ
ਮਜਲੂਮਾਂ ਨੂੰ ਲੁੱਟਕੇ , ਕੀਤੇ ਕਈ ਅੱਤਿਆਚਾਰ
ਮੇਰਾ ਰੂਪ ਬਦਲਿਆ ਗੁਰਾਂ ਨੇ , ਕਰ ਤਕੜਿਆਂ ਉੱਤੇ ਵਾਰ
ਗਊ ਗਰੀਬਾਂ ਮਾੜਿਆ ਲਈ , ਚੱਤੋਂ ਪਹਿਰ ਤਿਆਰ
ਵੈਰੀ ਅੱਜ ਵੀ ਕੰਬਦੇ , ਜਦੋਂ ਆਵਾਂ ਬਾਹਰ ਮਿਆਨ